"Tutasimamia utoaji wa mikopo ya aslimia 10 ifikie walengwa" - DC Mpogolo

Tarehe iliyowekwa: June 14th, 2025

Na: Doina Mwambagi

Mkuu wa Wilaya ya Ilala, Mheshimiwa Edward Mpogolo, ameahidi kusimamia kwa ukaribu utekelezaji wa mpango wa utoaji wa mikopo ya asilimia 10 kutoka kwa mapato ya ndani, ikiwa ni utekelezaji wa malengo ya Serikali ya Awamu ya Sita ya Mheshimiwa Rais Samia Suluhu Hassan, ya kuwawezesha wanawake, vijana, na watu wenye ulemavu kiuchumi.

Akizungumza katika Kongamano la Jukwaa la Wanawake Wajasiriamali Ilala lililofanyika Leo tarehe 14 Juni 2025   katika Ukumbi wa Diamond Jubilee, DC Mpogolo amesema kuwa mkopo huu ni sehemu ya mikakati mikuu ya Serikali ya Awamu ya Sita ambayo inalenga kuwezesha wanawake kuwa na nguvu za kifedha na kujikwamua kiuchumi.

“Serikali ya Awamu ya Sita imetupa maelekezo thabiti kuhakikisha mikopo hii inawafikia walengwa hasa wanawake, vijana, na watu wenye ulemavu. Tutaendelea kusimamia kwa karibu utekelezaji wake kwa uwazi na usawa bila kupendelea wala kuangalia upande wowote,” amesema DC Mpogolo.

Kwa upande wake, Mkurugenzi wa Jiji la Dar es Salaam, Ndugu Elihuruma Mabelya, amesema  kuwa zaidi ya shilingi bilioni 5  zinaenda  kuwanufaisha  wanawake, jambo linaloonyesha jitihada za serikali kuimarisha nafasi ya mwanamke katika uchumi wa taifa huku akisistiza kuwa maandalizi ya  utoaji rasmi wa mikopo kwa vikundi vilivyoidhinishwa yamekamilika, na mchakato utaanza kwa kufuata sheria, kanuni mpya, na mfumo wa kibenki.

Mikopo ya asilimia 10 ni  jitihada za Serikali ya Awamu ya Sita za kuleta maendeleo endelevu kwa wanawake, vijana, na watu wenye ulemavu.